నటి మీరా వాసుదేవన్ (Meera Vasudevan) తన వ్యక్తిగత జీవితంపై చేసిన వ్యాఖ్యలు ప్రస్తుతం సోషల్ మీడియాలో హాట్ టాపిక్ గా మారాయి. “గోల్మాల్”, “అంజలి ఐ లవ్ యూ” వంటి తెలుగు చిత్రాల్లో నటించిన ఆమె, తర్వాత మలయాళ సినిమాల్లో మంచి గుర్తింపు తెచ్చుకుంది. ముఖ్యంగా మలయాళంలో “తన్మాత్ర” చిత్రంతో ప్రశంసలు అందుకుంది.
ఆమె మూడు సార్లు పెళ్లి చేసుకొంది. మూడు విఫలం అయ్యాయి. ప్రస్తుతం కొడుకుతో సింగిల్ గా జీవితాన్ని గడుపుతోంది.
మూడు పెళ్లిళ్ల కారణంగా జీవితంలో ఎంతో విలువైన సమయాన్ని కోల్పోయానని మీరా వాసుదేవన్ తాజాగా ఒక ఇంటర్వ్యూలో వెల్లడించింది.
“నా కొడుకుతో నేను ఎప్పుడూ చెబుతుంటాను… మూడు అర్థంలేని పెళ్లిళ్ల కోసం నా జీవితంలోని 17 సంవత్సరాలు వృథా చేసుకున్నాను. ఆ సమయంలో నేను తెలివిగా కెరీర్పై దృష్టి పెట్టి ఉంటే ఇంకా చాలా సాధించేదాన్ని,” అని పేర్కొంది.
సినిమా, ఫిట్నెస్, మంచి స్నేహితులని పెంచుకోవడం వంటి తనకు ఇష్టమైన విషయాలపై దృష్టి పెట్టాల్సిందిపోయి, తనను గౌరవించని వ్యక్తుల కోసం సమయం వృథా చేసుకున్నానని ఆమె ఆవేదన వ్యక్తం చేసింది.
