సంతృప్తి లేదు, నిరాశ లేదు: మారుతి

దర్శకుడు మారుతి చాలా కామెంట్స్ ఎదుర్కొంటున్నారు. ఆయన తీసిన “ది రాజా సాబ్” చిత్రం నిన్న విడుదల అయింది. అసలే ప్రభాస్ కి డైహార్డ్ ఫ్యాన్స్ ఎక్కువ. వాళ్ళ అంచనాలు వేరు. మరి, ఈ సినిమాకి చాలా నెగెటివ్ కామెంట్లు రావడం, ముఖ్యంగా కామెడీ రైటింగ్, తీయడంపై విమర్శకులు చీల్చి చెండాడిన నేపథ్యంలో మారుతి ఒత్తిడిలో ఉన్నారు.

ఐతే అభిమానులు మాత్రం నిరాశ చెందలేదు ఈ సినిమా చూసి అనేది మారుతి అభిప్రాయం.

“వాళ్ళని ఈ సినిమా సంతృప్తి పరచలేదు. అలాగే నిరాశపర్చలేదు. వాళ్ళ అంచనాలు అందుకోలేకపోయాం. కానీ ప్రభాస్ ని కొత్తగా గ్లామర్ గా చూపించాం. వాళ్ళు కోరుకున్నది అదే. కాకపోతే ఇంకా బెటర్ గా తీయాల్సింది అనే మాట అంటున్నారు,” అని మారుతి విడుదలైన రెండో రోజు చేసిన కామెంట్ ఇది.

“ఏది ఏమైనా నాలాంటి మిడ్ రేంజ్ డైరెక్టర్ ని కూడా ప్రభాస్ సినిమా తీశాడనిపించేలా చేసిన మా హీరో ప్రభాస్ గారికి జన్మంతా రుణపడి ఉంటాను. ఇక ప్రభాస్ గారిని కొత్తగా చూపించాలని ప్రయత్నించాను. ముఖ్యంగా మైండ్ గేమ్స్ బాగా నచ్చింది చాలా మందికి. చివర్లో 40 నిమిషాలు అందరూ మెచ్చుకుంటున్నారు,” అని మారుతి అన్నారు.

ALSO READ: ది రాజా సాబ్ రివ్యూ: తడబడిన కథనం

“నేను కూడా ప్రభాస్ తో రెగ్యులర్ కమర్షియల్ కథ చెప్పొచ్చు. కానీ ఇలాంటి కథ, కొత్తదనం ఉన్న మైండ్ గేమ్స్ ఎపిసోడ్ లు పెద్ద హీరోతో కూడా చెయ్యాలి అనే ఉద్దేశంతో, ప్రభాస్ గారి ప్రోత్సాహంతో తీశాం. కొత్త పాయింట్ కాబట్టి కొంచెం టైం తీసుకుంటుంది. రకరకాల కామెంట్స్ వస్తున్నాయి. రిజల్ట్ గురించి ఇప్పుడే ప్రకటించొద్దు. ఇప్పుడు సెకండాప్ఫ్ షార్ప్ చేశాం. ఆ ఓల్డ్ గెటప్ ఎపిసోడ్ కూడా పెట్టాం ఇప్పుడు. అది యాడ్ చేశాం. ఈ రోజు నుంచి ఉంటుంది థియేటర్లో,” మారుతి వివరణ ఇచ్చారు.