ఆయన చెప్పిందల్లా చేశా: హెబ్బా

“కుమారి 21 ఎఫ్” విడుదలైనప్పుడు ఇంత బోల్డ్ హీరోయినా అని అందరూ ఆశ్చర్యపోయారు. అప్పటికీ, ఇప్పటికీ బోల్డ్ హీరోయిన్ క్యారెక్టరైజేషన్ లో ఈ ‘కుమారి’దే అగ్రస్థానం. మరి ఇలాంటి ఛాలెంజింగ్ పాత్రను హీరోయిన్ హెబ్బా పటేల్ ఎలా ఒప్పుకుంది. దీనికి సంబంధించి ఆసక్తికర విషయాన్ని బయటపెట్టింది హెబ్బా పటేల్.

“కుమారి 21 ఎఫ్ కథ మొత్తం నాకు చెప్పలేదు. షూటింగ్ కు వెళ్లకముందు రఫ్ ఐడియా ఇచ్చారు. సెట్స్ పైకి వచ్చిన తర్వాత పూర్తి స్టోరీ చెప్పారు. నేను టైటిల్ రోల్ చేస్తున్నాననే విషయం కూడా సెట్స్ పైకి వెళ్లిన తర్వాతే తెలిసింది. నేనేం ప్లాన్ చేయలేదు, ఫ్లోలో అలా జరిగిపోయింది. వాళ్లు ఏం అడిగారో అదంతా చేశాను.”

ఇలా “కుమారి 21 ఎఫ్” సినిమా వెనక జరిగిన కథను బయటపెట్టింది హెబ్బా పటేల్. పైగా ఆ సినిమా టైమ్ లో తన కెరీర్ డౌన్ ఫాల్ లో ఉందని, కాబట్టి ఆ సినిమా చేయక తప్పలేదని తెలిపింది. ప్రతి రోజూ ఫ్రెష్ మైండ్ తో సెట్స్ కు వెళ్లేదంట హెబ్బా. దర్శకుడు ఏం చెబితే దాన్ని అలా చేసి చూపించేదట. అందుకే ఆ సినిమా తనకు పెద్దగా గుర్తులేదంటోంది.

ఈమె నటించిన ‘ఓదెల-2’ త్వరలోనే థియేటర్లలోకి వస్తోంది. ‘ఓదెల’ సినిమా ఎక్కడ ముగిసిందో, “ఓదెల-2” సరిగ్గా అక్కడే మొదలౌతుందని చెబుతోంది హెబ్బా పటేల్.