NTR: ‘పొలిటికల్ పుకార్ల’ వలయంలో చిక్కుకున్న డ్రాగన్

ఎన్టీఆర్ కి రాజకీయాలు కొత్త కాదు. 2009లోనే ఎన్టీఆర్ తెలుగుదేశం పార్టీ తరఫున ప్రచారం చేశారు. ఐతే, ఆ తర్వాత టీడీపీ కార్యకలాపాలకు , రాజకీయాలకు దూరంగా ఉంటూ వస్తున్నారు. పూర్తిగా సినిమా కెరీర్ పైనే ఫోకస్ నిలిపారు.

తాజాగా ఎన్టీఆర్ తమిళ హీరో విజయ్ రాజకీయఅరంగేట్రం స్పూర్తితో మనసు మార్చుకున్నట్లు వార్తలు వచ్చాయి. విజయ్ ఎలా ఐతే అభిమానుల సంఘాన్ని సేవా కార్యక్రమాలకు వేదికగా చేసి మెల్లగా రాజకీయాల్లోకి అడుగుపెట్టినట్లు ఎన్టీఆర్ కూడా అదే పంథాలో వెళ్తున్నాడు అని అంటున్నారు.

అందుకే ఎన్టీఆర్ అభిమాన సంఘం “RAW NTR” త్వరలో ఒక కార్యక్రమం చేపట్టింది అని ప్రచారం జరుగుతోంది. ఈ నేపథ్యంలో ఎన్టీఆర్ అలెర్ట్ అయ్యారు. ఆ సంస్థకు తనకు ఎలాంటి సంబంధం లేదని క్లారిటీ ఇచ్చారు.

“RAW NTR పేరుతో కార్యకలాపాలు నిర్వహిస్తున్న ఒక సంస్థ, శ్రీ ఎన్టీఆర్ గారితో సంబంధం ఉన్నట్టుగా ప్రజల్లో భావన కలిగించే విధంగా వ్యవహరిస్తున్న విషయం మా దృష్టికి వచ్చింది. ఎన్టీఆర్ గారికి గానీ, ఆయన కార్యాలయానికి గానీ, RAW NTR అనే సంస్థతో లేదా దాని కార్యకలాపాలతో ఎలాంటి సంబంధం, అనుబంధం, అనుమతి లేదా ప్రమేయం లేదు. ఆ సంస్థకు శ్రీ ఎన్టీఆర్ గారి తరఫున ప్రాతినిధ్యం వహించే హక్కు లేదు. అలాగే, ఆయన పేరుతో ఎలాంటి ప్రకటనలు చేయడానికి లేదా కార్యక్రమాలు నిర్వహించడానికి ఎలాంటి అధికారమూ లేదు.

ఎన్టీఆర్ గారికి సంబంధించిన ఏదైనా సేవా కార్యక్రమం, ప్రజా సంక్షేమ కార్యక్రమం, అధికారిక ప్రకటన లేదా ఇతర కార్యకలాపాల గురించి సమాచారం శ్రీ ఎన్టీఆర్ గారు లేదా ఆయన అధికారిక బృందం ద్వారా మాత్రమే వెల్లడించబడుతుంది. అనధికారిక వ్యక్తులు లేదా సంస్థల ద్వారా ప్రచారం చేయబడే సమాచారం, ప్రకటనలు లేదా కార్యక్రమాలను అధికారికమైనవిగా లేదా విశ్వసనీయమైనవిగా పరిగణించవద్దని మనవి.

ఈ అంశంపై ఇదే మా తరఫున తుది వివరణ. దీనితో ఈ విషయానికి సంబంధించిన అన్ని అపోహలు, వదంతులు, ఊహాగానాలకు పూర్తిగా ముగింపు పలుకుతాయని ఆశిస్తున్నామ,”ని ఎన్టీఆర్ తన కార్యాలయం ద్వారా ప్రకటన జారీ చేశారు.