నిమ్స్ లో ఆర్ నారాయణమూర్తి!

పీపుల్ స్టార్, అందరివాడు ఆర్.నారాయణమూర్తి అస్వస్థతకు గురయ్యారు. ఆయన్ను వెంటనే హైదరాబాద్ నిమ్స్ హాస్పిటల్ లో జాయిన్ చేశారు. డాక్టర్ బీరప్ప నేతృత్వంలో నారాయణమూర్తికి పూర్తిస్థాయిలో వైద్య పరీక్షలు నిర్వహించారు. ఆయనకు సాధారణ టెస్టులే చేశామని, ఎలాంటి సమస్య లేదని, కోలుకుంటున్నారని వైద్యులు ప్రకటించారు.

తన అస్వస్థతపై నారాయణ మూర్తి కూడా స్పందించారు. తను ప్రస్తుతం ఆరోగ్యంగానే ఉన్నానని ఆయన ప్రకటించారు. అభిమానులు ఆందోళన చెందాల్సిన అవసరం లేదని, నిమ్స్ లో తనకు మంచి ట్రీట్ మెంట్ దొరికిందని తెలిపారు.

ఈరోజు ఉదయం ప్రసాద్ ల్యాబ్స్ లో ప్రెస్ మీట్ ఏర్పాటుచేశారు నారాయణ మూర్తి. కానీ ఏమీ మాట్లాడలేకపోయారు, తనకు నీరసంగా ఉందని, ఏమీ మాట్లాడలేకపోతున్నానని మాత్రమే అన్నారు. లోపల ఏదో అవుతోందని, బాగా అలసటగా ఉందని అన్నారు. వెంటనే ఆయన్ను నిమ్స్ లో చేర్పించారు.

అన్నీ తానై సినిమాలు తీసే నారాయణ మూర్తి, తాజాగా యూనివర్సిటీ అనే మూవీని రిలీజ్ చేశారు. ప్రస్తుతం ఉక్కు సంకల్పం అనే సినిమా తీస్తున్నారు. ఆయన వయసు 70 ఏళ్లు. కొన్ని నెలల కిందట ఆయనకు బైపాస్ సర్జరీ జరిగింది.