టాలీవుడ్ సీనియర్ హీరోల్లో మల్టీస్టారర్లు చేయడానికి వెంకటేష్ ఎప్పుడూ ముందుంటారు. అయితే ఆయన ఇలా మల్టీస్టారర్లు చేయాలనే ఆలోచన చేసింది మాత్రం చాన్నాళ్ల కిందట. దానికి సంబంధించిన ఓ ఆసక్తికర విషయాన్ని విశ్వనటుడు కమల్ హాసన్ బయటపెట్టారు.
గతంలో మర్మయోగి అనే సినిమా అనుకున్నారు కమల్ హాసన్. ఆయన ప్రకటించి ఆగిపోయిన ఎన్నో సినిమాల్లో అది కూడా ఒకటి. ప్రయోగాత్మకంగా చేద్దామనుకున్న ఆ సినిమా నిజానికి ఓ మల్టీస్టారర్. అందులో మరో హీరో పాత్ర కోసం వెంకటేష్ ను అనుకున్నారట కమల్ హాసన్. అప్పుడెప్పుడో 2 దశాబ్దాల కిందటే దానికి సంబంధించి వెంకీ-కమల్ మధ్య కథాచర్చలు కూడా జరిగాయంట. అయితే కొన్ని కారణాల వల్ల ఆ ప్రాజెక్టు సెట్స్ పైకి రాలేదు.
ఈ విషయాన్ని స్వయంగా కమల్ హాసన్ బయటపెట్టారు. విక్రమ్ సినిమా ప్రమోషన్ లో భాగంగా మాట్లాడిన కమల్ హాసన్, వెంకటేష్ అంటే తనకు ఎంతో అభిమానం అన్నారు. ఆ సందర్భంగా వెంకీతో సినిమా చేసే అవకాశం మిస్ అయిందని చెప్పుకొచ్చారు. సో.. మల్టీస్టారర్లు చేయాలనే ఆలోచన వెంకటేష్ మనసులో చాన్నాళ్లుగా ఉందనే విషయం, తాజాగా కమల్ బయటపెట్టిన ఉదంతంతో అందరికీ తెలిసొచ్చింది.
This post was last modified on June 1, 2022 9:50 pm