ఎప్పుడో ఆగిన మూవీ, ఇంకా ఆగని రగడ

ఓ సినిమాకు వర్కింగ్ టైటిల్ ఉంటుంది. తర్వాత అసలు టైటిల్ ప్రకటిస్తారు. ఆల్రెడీ టైటిల్ ప్రకటించి, దాని స్థానంలో కొత్తగా మరో పేరు పెట్టిన సందర్భాలు కూడా ఉన్నాయి. కానీ కీర్తిసురేష్ నటిస్తున్న ఓ సినిమాకు మాత్రం ముచ్చటగా మూడోసారి టైటిల్ మారుస్తున్నారు.

కీర్తి సురేష్ హీరోయిన్ గా అడుగుపెట్టిన తొలినాళ్లలో ఒక సినిమా మొదలైంది. కీర్తిసురేష్ హీరోయిన్ గా, నవీన్ విజయకృష్ణ హీరోగా ఓ సినిమా షూటింగ్ మొదలై ఆగిపోయింది. దానికి “జానకితో నేను” అనే టైటిల్ పెట్టారు అప్పుడు. ఆ తర్వాత కొన్ని రోజులకు “అయినా ఇష్టం నువ్వు” అనే టైటిల్ ఫిక్స్ చేశారు. ఇప్పుడు తాజాగా దీనికి “రెండు జళ్ల సీత” అనే టైటిల్ అనుకుంటున్నారు. కీర్తి సురేష్ కి ఇప్పుడు ఉన్న క్రేజ్ ని యూజ్ చేసుకునేందుకు ఈ “పాత” సినిమాని రిలీజ్ చేసే ప్రయత్నాలు షురూ అయ్యాయి.

నిజానికి ఈ సినిమాపై కాపీరైట్ ఇష్యూ నడుస్తోంది.

చంటి అడ్డాల ఈ సినిమాకు నిర్మాత. ఆయన ఈ సినిమా హక్కుల్ని తనకు అమ్మేశారని మరో నిర్మాత నట్టికుమార్ వాదిస్తున్నారు. తన దగ్గర బాండ్ పేపర్ సాక్ష్యాలు కూడా ఉన్నాయంటున్నారు. అటు చంటి మాత్రం ఈ సినిమాను ఎవ్వరికీ అమ్మలేదంటున్నారు. వీళ్లిద్దరూ కలిసి ఈ సినిమా టైటిల్స్ ను ఎడాపెడా మార్చేస్తున్నారు. ప్రస్తుతం ఈ పంచాయితీ పోలీస్ స్టేషన్ వరకు వెళ్లింది.