Thaman: ఆ సినిమా కోసం ఇది వదులుకున్నాడా?

ఊహించని విధంగా త్రివిక్రమ్ (Trivikram) ప్రాజెక్టులోకి వచ్చి చేరాడు తమన్ (Thaman). వెంకీతో త్రివిక్రమ్ చేస్తున్న ‘ఆదర్శ కుటుంబం’ (Adarsha Kutumbam) సినిమాకు హర్షవర్షన్ రామేశ్వర్ (Harshavardhan Rameshwar) ఇన్నాళ్లూ సంగీత దర్శకుడిగా వ్యవహరించాడు. ఇప్పుడా స్థానాన్ని తమన్ భర్తీ చేశాడు.

తను త్రివిక్రమ్ తో కలిసి మరోసారి వర్క్ చేస్తున్నానని తమన్ స్వయంగా ప్రకటించాడు. ఆల్రెడీ మ్యూజిక్ సిట్టింగ్స్ కూడా మొదలయ్యాయి. ఈ సంగతి పక్కనపెడితే, త్రివిక్రమ్ తో వర్క్ చేసేందుకు, చేతివరకు వచ్చిన ఓ క్రేజీ ప్రాజెక్టును తమన్ వదులుకున్నాడనే చర్చ జరుగుతోంది. పైగా అది బాలయ్య సినిమా.

అవును.. బాలయ్య, కొరటాల కాంబోలో రాబోతున్న సినిమాకు ముందుగా తమన్ నే అనుకున్నారు. ఇందులో ఎవ్వరికీ ఎలాంటి ఆశ్చర్యం లేదు. ఎందుకంటే, బాలయ్య సినిమాలకు తమనే బ్యాక్ టు బ్యాక్ వర్క్ చేస్తున్నాడు. ప్రస్తుతం మార్కెట్లో నందమూరి అభిమానులు అతడ్ని ముద్దుగా ‘నందమూరి తమన్’ అని కూడా పిలుచుకుంటారు.

బాలయ్యతో అంతటి అనుబంధం ఉన్నప్పటికీ, త్రివిక్రమ్-వెంకీ సినిమా కోసం తమన్ ఆ ప్రాజెక్టును వదులుకున్నాడనే చర్చ జరుగుతోంది. అంతేకాదు, తమన్ స్థానంలో అనిరుధ్ కోసం ప్రయత్నిస్తున్నట్టు కూడా కథనాలు వస్తున్నాయి.

మొన్నటికిమొన్న ‘ఉస్తాద్ భగత్ సింగ్’ కోసం తమన్ ను ఆఖరి నిమిషంలో తీసుకున్న సంగతి తెలిసిందే. అప్పుడా విషయం ఎంత హాట్ టాపిక్ గా మారిందో, ఇప్పుడు తమన్ పై మరోసారి అదే విధంగా హాట్ హాట్ చర్చ సాగుతోంది.