ప్రభాస్ ని మొన్నటి వరకు పాన్ ఇండియా స్టార్ అన్నారు. కొన్నాళ్లుగా ఆయన సినిమాలన్నీ తెలుగుతో పాటు హిందీ, తమిళ, మలయాళ, కన్నడ భాషల్లో ఒకేసారి విడుదలవుతున్నాయి. కానీ, ఇప్పుడు పాన్ వరల్డ్ స్టార్ గా మారుతున్నట్లు కనిపిస్తుంది. అంటే ప్రపంచంలో ఉన్న చాలా దేశాల మార్కెట్ పై కన్నేశారు ప్రభాస్.
‘బాహుబలి’ సినిమాతో ఇప్పటికే ప్రభాస్ కి జపాన్ మార్కెట్ లో కొంత పట్టు వచ్చింది. ఇప్పుడు చైనా, కొరియా వంటి ఇతర మార్కెట్స్ పై కూడ పట్టు సాధించాలని అనుకుంటున్నాడు. ప్రభాస్, సందీప్ వంగా కాంబినేషన్ లో ‘స్పిరిట్’ అనే సినిమాని తాజాగా ప్రకటించారు. ఇది ప్రభాస్ కెరీర్ లో 25వ చిత్రంగా తెరకెక్కుతుంది. ఈ సినిమాని మొత్తంగా ఎనిమిది భాషల్లో విడుదల చెయ్యనున్నారు.
సినిమాని ఈ రోజు (అక్టోబర్ 7)న ప్రకటించారు. ఈ పోస్టర్ లోనే ఎనిమిది భాషల పేర్లు వేశారు. ఇది 2024లో విడుదలయ్యే అవకాశం ఉంది.
ప్రస్తుతం ప్రభాస్ నటిస్తున్న నాలుగు చిత్రాలు లైన్ లో ఉన్నాయి. అందులో ‘రాధే శ్యామ్’ వచ్చే సంక్రాంతికి విడుదల అవుతుంది. ఆ తర్వాత మరో మూడు సినిమాలు విడుదల కావాలి. అవి: ఆదిపురుష్, సలార్, ప్రాజెక్ట్ కే. ఈ మూడు కాకుండా ఇంకో మూవీ కూడా చేస్తాడు ప్రభాస్. ఆ తర్వాత ‘స్పిరిట్’ వస్తుంది.
