త్వరలో సక్సెస్ ఈవెంట్: విజయ్ కిరగందూర్

“సలార్ సీజ్ ఫైర్’ మూవీ జర్నీ గురించి హోంబలే ఫిలిమ్స్ అధినేత విజయ్ కిరగందూర్ మీడియాతో పంచుకున్నారు.

‘సలార్’ జర్నీ ఎలా ప్రారంభమైంది?

మేం సలార్ సినిమాను 2021లో ముమూర్తం పెట్టి స్టార్ట్ చేశాం. కానీ తర్వాత కోవిడ్ స్టార్ట్ అయ్యింది. కోవిడ్ రెండు వేవ్స్ కారణంగా సినిమా షూటింగ్ స్టార్ట్ కావటానికి సమయం తీసుకున్నాం. 2022లో పూర్తి స్థాయి షూటింగ్ ప్రారంభమైంది. ఈ ఏడాది జనవరిలో షూటింగ్‌ను పూర్తి చేశాం. తర్వాత పోస్ట్ ప్రొడక్షన్ వర్క్ స్టార్ట్ చేశాం. ఐదు భాషల్లో సినిమాను విడుదల చేయాలనుకున్నాం కాబట్టి చాలా జాగ్రత్తలు పాటిస్తూ వచ్చాం. 90 శాతం షూటింగ్‌ని తెలంగాణ, ఏపీలో చిత్రీకరించాం.

‘సలార్’ మేకింగ్ పరంగా మీకు ఎదురైన ఛాలెంజెస్ ఏంటి?

మేకింగ్ పరంగా ఛాలెంజెస్ అంటే పెద్దగా లేవు. అయితే కెజియఫ్ వంటి భారీ హిట్ మూవీ తర్వాత మా బ్యానర్‌లో ప్రభాస్ నటిస్తుండటం, ప్రశాంత్ నీల్ ఆ సినిమాను డైరెక్ట్ చేస్తుండటంతో సినిమాపై అంచనాలు పీక్స్‌లో వచ్చాయి. సలార్ కోసం ఓ కొత్త ప్రపంచాన్ని క్రియేట్ చేశాం. దాని కోసం మేకింగ్ పరంగా ఎక్కడా కాంప్రమైజ్ కాలేదు. మేకింగ్‌లో సవాళ్లు తప్ప, మరేం కాలేదు

నిర్మాతగా పదేళ్లు పూర్తయ్యాయి. మీ జర్నీ గురించి ఏం చెబుతారు?

నిర్మాతగా నా నాలుగో సినిమా “కె.జి.యఫ్ 1” తర్వాత “యువరత్న”, “కె.జి.యఫ్ 2”, “కాంతార” సినిమాలను రూపొందించాను. ఇప్పడు “సలార్‌”తో మీ ముందుకు రాబోతున్నాను. నిర్మాతగా అప్పుడు ఉన్న నాలెడ్జ్‌కి ఇప్పుడు నాకున్న నాలెడ్జ్‌కి చాలా తేడా ఉంది. నెట్ వర్క్ పెరిగింది. నిర్మాతగా నా ఆలోచనా విధానంలో మార్పు లేదు. ఇండియన్ సినీ ఇండస్ట్రీ రేంజ్‌ని నెక్ట్స్ రేంజ్‌కి తీసుకెళ్లాలనేదే నా ఆలోచన. మన సంస్కృతి, సాంప్రదాయాలు, భాషలు అన్నీ వేర్వేరుగా ఉంటాయి. అయితే అన్నీ కలిస్తేనే ఇండియన్ సినీ ఇండస్ట్రీ అవుతుంది. దాన్ని గ్లోబెల్ రేంజ్‌కి తీసుకెళ్లాలనేదే నా అభిప్రాయం. అంతే తప్ప ఇది తెలుగు, ఇది కన్నడ సినిమా అని ఆలోచించటం లేదు.

డైరెక్టర్ ప్రశాంత్ నీల్‌తో మీకున్న అనుబంధం గురించి చెప్పండి?

ప్రశాంత్ నీల్‌ నాకొక డైరెక్టర్‌గా పరిచయం అయ్యారు. తర్వాత ఫ్రెండ్, తర్వాత క్లోజ్ ఫ్రెండ్ అయ్యారు. ఇప్పుడు ఫ్యామిలీ మెంబర్ అయిపోయారు. సినిమా విషయానికి వస్తే తనకున్న క్రియేటివిటీకి నేనొక ఫ్లాట్ ఫామ్ మాత్రమే. తన క్రియేటివిటీకి ఏం కావాలనే విషయాలను సమకూర్చటం అనేది నిర్మాతగా నా బాధ్యత.

మీ బ్యానర్‌లో వస్తున్న సినిమాలు రెండు భాగాలుగా చేయటానికి కారణమేంటి?

నిజానికి కెజియఫ్ స్టార్ట్ చేసినప్పుడు రెండో భాగం తీయాలని అనుకోలేదు. షూటింగ్ స్టార్ట్ అయిన తర్వాత అందులోని కంటెంట్‌ని గమనించిన డైరెక్టర్‌గారు టీమ్ అంతటినీ పిలిపించి కూర్చొని మాట్లాడారు. ఈ సినిమాను చేస్తే కుదించి చెప్పాలి. లేదా.. రెండు భాగాలుగా తీయాలని ఆయన అన్నారు. అలా కె.జి.యఫ్ 2ను స్టార్ట్ చేశాం. అయితే కాంతార విషయంలో అలా కాదు. మా దగ్గర రెండు, మూడు కథలున్నాయి. అయితే కర్ణాటకలో ఎక్కడో మారుమూల ఉండే ఓ ప్రాంతానికి చెందిన ప్రజల సాంప్రదాయాన్ని, నమ్మకాన్ని ఇతరుల ఎలా తీసుకుంటారా? అని. అయితే కొత్త ప్రయత్నం కదా, చేద్దామని కాంతార చేశాం. ఆడియెన్స్ నుంచి సూపర్బ్ రెస్పాన్స్ వచ్చింది. ఆ తర్వాతే ‘కాంతార చాప్టర్ 1’ను చేయాలని అనుకుని స్టార్ట్ చేశాం. రెండు, మూడు పార్టులుగా రూపొందించేంత కంటెంట్ కాంతారలో ఉంది. ‘సలార్’ విషయంలోనూ అంతే. ఇందులో సినిమాను రెండు భాగాలుగా చేసేంత డ్రామా ఉంది. అందువల్లనే రెండు భాగాలుగా రూపొందించాలని అనుకున్నాం.

తెలుగు ఇండస్ట్రీ, ఆడియెన్స్ నుంచి మీకు వస్తున్న రెస్పాన్స్ ఎలా ఉంది?

ఒక్కమాటలో చెప్పాలంటే సింప్లీ సూపర్బ్. ఇండస్ట్రీ వాళ్లందరూ చక్కగా రిసీవ్ చేసుకున్నారు. అలాగే ఇక్కడి ఆడియెన్స్ రెస్పాన్స్ గురించి ప్రత్యేకంగా చెప్పనక్కర్లేదు. వాళ్లు సినిమాను ఆదరిస్తున్న తీరే అందుకు ఉదాహరణ.

‘సలార్’పై ఎక్స్‌పెక్టేషన్స్ చూస్తుంటే ఏమనిపిస్తుంది?

ప్రభాస్ ఓ సూపర్ స్టార్. పాన్ ఇండియా రేంజ్‌లో ప్రశాంత్ నీల్ పెద్ద డైరెక్టర్. కెజియఫ్ తర్వాత ప్రశాంత్ నీల్ ఎలాంటి కథను చూపించబోతున్నాడో, ప్రభాస్‌ను ఎలా చూపించబోతున్నారనే అందరూ ఎదురు చూస్తున్నారు. అందరి ఎక్స్‌పెక్టేషన్స్ రీచ్ అయ్యేలా సినిమా ఉంటుంది.

సలార్ మూవీ నుంచి గ్రాండ్ ఈవెంట్ ఎందుకు కండెక్ట్ చేయలేదు?

టైట్ టైమ్ షెడ్యూల్ లో ఉన్నాం. ఓ వైపు ప్రభాస్‌గారు, మరో వైపు ప్రశాంత్ నీల్ గారు ఇద్దరూ బిజీగా ఉన్నారు. సినిమా రిలీజ్ తర్వాత గ్రాండ్ సక్సెస్ ఈవెంట్‌ను కండెక్ట్ చేస్తాం.