సంయుక్తకి సంక్రాంతి టెన్షన్

గత నెలలో విడుదలైన “అఖండ 2″తో సంయుక్త మీనన్ కి భారీ ఫ్లాప్ దక్కింది. మొదటిసారి పక్కా మాస్ సినిమాలో నటించి, “జాజికాయ” అంటూ ఒక మాస్ సాంగ్ కూడా చేస్తే జనం తిప్పికొట్టారు. బాలయ్యతో నటించిన ఈ సినిమా ఆమెకి చేదు అనుభవం మిగిల్చింది. ఇప్పుడు మరో సినిమా విడుదలకు సిద్ధంగా ఉంది. అదే “నారి నారి నడుమ మురారి.”

శర్వానంద్ హీరోగా నటించిన ఈ సినిమాలో ఆమె ఒక హీరోయిన్. మరో హీరోయిన్ గా సాక్షి వైద్య నటించింది. ఐతే, ఈ సినిమాలో అసలు హీరోయిన్ సంయుక్తనే. ఈ సినిమా ఈ నెల 14న విడుదల కానుంది. పూర్తిగా వినోదాత్మక పద్దతిలో తీసిన ఈ సినిమాపై ప్రస్తుతం పెద్దగా అంచనాలు లేవు. కానీ, సాధారణంగా సంక్రాంతికి విడుదల అయ్యే సినిమాల్లో పెద్ద చిత్రాల కన్నా పెద్దగా అంచనాలు లేని సినిమాలే హిట్ అవుతుంటాయి.

గతంలో శర్వానంద్ నటించిన “శతమానం భవతి” అలాగే భారీ హిట్ అయింది. ఇప్పుడు కూడా అదే రిపీట్ అవుతుంది అని శర్వానంద్ ఆశ. సంయుక్తకి ఇప్పుడు అదే టెన్షన్. ఈ సినిమా అయినా తనని గట్టెక్కిస్తుందా అనేది ఆమె టెన్సన్.

అన్నట్లు సంయుక్త నటించిన మరో సినిమా “స్వయంభు” వచ్చే నెల విడుదల కానుంది. అంటే డిసెంబర్ లో “అఖండ 2”, జనవరి లో “నారి నారి నడుమ మురారి”, ఫిబ్రవరిలో “స్వయంభు”. ఒక్కో నెల ఒకటి. ఒక దాని ఫలితం వచ్చింది. కనీసం ఈ రెండోది అయినా హిట్ ఐతే కొంచెం రిలీఫ్.