Pawan Kalyan: సురేందర్ రెడ్డి సినిమా లేనట్లేనా

ఉస్తాద్ భగత్ సింగ్ (Ustaad Bhagat Singh) విడుదలైన నాలుగు రోజుల తర్వాత పవన్ కళ్యాణ్ (Pawan Kalyan) కి చెందిన నిర్మాణ సంస్థ పవన్ కళ్యాణ్ క్రియేటివ్ వర్క్స్ (Pawan Kalyan Creative Works) ఒక ప్రకటన చేసింది. పవన్ కళ్యాణ్ ఇప్పుడు వెంటనే ఏ సినిమా చేయబోవడం లేదంట.

“ఇప్పటికిప్పుడు పవన్ కళ్యాణ్ ఎలాంటి సినిమాలు ఒప్పుకోలేదు. ఏ సినిమాని స్టార్ట్ చెయ్యడం లేదు. ఓజి 2 గురించి కూడా పవన్ కళ్యాణ్ మాత్రమే చెప్తారు. పవన్ కళ్యాణ్ కొత్త సినిమాలకు సంబంధించి ఎలాంటి ఊహాగానాలకు తావు లేదు,” అని ప్రకటన సారాంశం.

ఉస్తాద్ భగత్ సింగ్ సరైన ఓపెనింగ్స్ కూడా పొందకపోవడం, బాక్సాఫీస్ పరంగా బాగా నిరాశపర్చడంతో పవన్ కళ్యాణ్ ఈ నిర్ణయం తీసుకున్నారు. మరి, ఇంతకుముందు ప్రకటించిన సురేందర్ రెడ్డి (Surender Reddy) చిత్రం అవుతుంది? అది ఇప్పట్లో స్టార్ట్ అవుతుందా? ఈ ప్రశ్నలకు ప్రస్తుతానికి సమాధానం లేదు.

దర్శకుడు సురేందర్ రెడ్డి, రచయిత వక్కంతం వంశీ ఇటీవలే పవన్ కళ్యాణ్ ని కలిశారు. సినిమాని అధికారికంగా ప్రకటించారు. నిజానికి ఉగాది సందర్భంగా సినిమా మొదలవుతుంది అని తెలిపారు. కానీ ఇప్పుడు ఏకంగా సినిమాని తాత్కాలికంగా నిలిపివేశారు.

ఇప్పుడు కాకపోయినా కొన్ని నెలల తర్వాత అయినా అది మొదలవుతుందా అనేది చూడాలి.