ఐటెంగాళ్ గా రాశి ఖన్నా ఎంట్రీ

రాశి ఖన్నా పదకొండేళ్ల కెరీర్ చేసుకొంది. 2014లో విడుదలైన “ఊహలు గుస గుసలాడే” సినిమాతో తెలుగులోకి అడుగుపెట్టింది. చాలా లాంగ్ కేరీర్ ఈ అమ్మడిది. ఇక ఇప్పుడు స్పెషల్ గీతాల్లోకి వచ్చింది.

ఇప్పటివరకు ఈ భామ ఐటెం సాంగ్స్ చెయ్యలేదు. “రాజా ది గ్రేట్” సినిమాలో ఒక పాటలో మెరిసింది కానీ అది ఐటెం సాంగ్ కాదు. ఇప్పుడు పూర్తిగా ఒక స్పెషల్ సాంగ్ చేస్తోంది.

సంక్రాంతికి విడుదల కానున్న “అనగనగా ఒక రాజు” చిత్రంలో ఈ భామ ఐటెం గాళ్ గా దర్శనమివ్వనుంది. తాజాగా ఈ పాట చిత్రీకరిస్తున్నారు. ఈ సినిమాలో నవీన్ పోలిశెట్టి హీరోగా నటిస్తుండగా, మీనాక్షి చౌదరి హీరోయిన్ గా నటిస్తోంది. ఇప్పుడు అదనపు ఆకర్షణగా రాశి ఖన్నా స్పెషల్ సాంగ్ చేరుతోంది.

రాశి ఖన్నా ఈ ఏడాది “తెలుసు కదా” చిత్రంలో నటించింది. అది ఫ్లాప్ అయింది. హిందీలో కూడా “120 బహద్దూర్” అనే సినిమాలో నటిస్తే అది ఆడలేదు. తమిళ్ లో కూడా ఒక సినిమాలో కనిపించింది. మొత్తంగా 2025లో మూడు భాషల్లో కలిపి మూడు సినిమాలు చేస్తే ఒక్కటీ హిట్ కాలేదు.

కానీ 2026 ఆమెకి బ్రైట్ గా కనిపిస్తోంది. ఆమె పవన్ కళ్యాణ్ సరసన నటించిన “ఉస్తాద్ భగత్ సింగ్”” వచ్చే వేసవిలో విడుదల కానుంది. ఇది ఆమె కేరీర్ కి పెద్ద చిత్రం. ఇక ఈ స్పెషల్ సాంగ్ కూడా వచ్చే సంక్రాంతి సీజన్ లో విడుదల అవుతోంది. అలాగే హిందీలో రెండు సినిమాలు ఉన్నాయి.