తెలుగు ప్రేక్షకులకు శివ కార్తికేయన్ బాగా తెలుసు. ఇటీవలే “ప్రిన్స్”గా తెలుగులో నటించాడు. తాజాగా ఆయన హీరోగా నటించిన ‘అయలాన్’ సంక్రాంతి కానుకగా తమిళనాడులో విడుదలైంది. కానీ తెలుగునాట నాలుగు తెలుగు చిత్రాలు విడుదల కావడంతో ఈ సినిమా పండుగ వేళ మన దగ్గర విడుదల కాలేదు.
ఈ సినిమాని ఇప్పుడు తెలుగులో రిపబ్లిక్ డే సందర్భంగా జనవరి 26న విడుదల చెయ్యనున్నారు.
రకుల్ ప్రీత్ సింగ్ హీరోయిన్ గా నటించిన ఈ సినిమాలో గ్రాఫిక్స్ అద్భుతంగా ఉన్నాయట. అయలాన్ అంటే ఏలియన్. బాలీవుడ్ లో ఏలియన్ ప్రధాన పాత్రలో సినిమాలు వచ్చాయి కానీ దక్షిణాదిలో ఇదే మొదటిసారి.
ఆర్. రవికుమార్ దర్శకత్వం వహించిన ఈ చిత్రాన్ని జెఆర్ స్టూడియోస్ పతాకంపై కోటపాడి జె. రాజేష్ నిర్మించారు.
”హాలీవుడ్ స్థాయికి ఏమాత్రం తీసిపోని విధంగా సినిమాలో విజువల్ ఎఫెక్ట్స్ ఉన్నాయి. తెలుగు ప్రేక్షకులకు ఈ సినిమా చూపించాలని ఈ నెల 26న ఏపీ, తెలంగాణలో విడుదల చేస్తున్నాం” అని చెప్పారు నిర్మాత రాజేష్.
