స్పీడ్ గా సినిమాలు చెయ్యడంలో రవితేజని మించినోడు లేడు అంటారు. నిజమే ఒకప్పుడు ఏడాదికి రెండు సినిమాలు విడుదల చేసి, మరోటి సెట్ మీద ఉంచి తన దూకుడు ఎలా ఉంటుందో చూపించేవారు. ఇప్పుడు రవితేజని మించిపోయాడు నాని. ఈ ఏడాది “దసరా” సినిమాని విడుదల చేసిన నాని తాజాగా “హాయ్ నాన్న” అనే సినిమా షూటింగ్ మొత్తం పూర్తి చేశారు. ఈ క్యాలెండర్ ఇయర్ పూర్తి కావడానికి ఇంకా మూడు నెలల సమయం మిగిలే ఉంది.
సో, ఈ గ్యాప్ లో మరో రెండు సినిమాలు సెట్ మీదకి తీసుకెళ్లేలా అంతా సిద్ధం చేసుకుంటున్నారు నాని.
దర్శకుడు వివేక్ ఆత్రేయ కాంబినేషన్ లో ఇప్పటికే “అంటే సుందరానికి” అనే సినిమా చేసిన నాని తాజాగా మరోటి చెయ్యనున్నారు. ఈ సినిమాకి దానయ్య నిర్మాత. ఈ నెలలలోనే షూటింగ్ ప్రారంభం అవుతుంది. ఇక, డిసెంబర్ లో తమిళ దర్శకుడు సీబీ చక్రవర్తి దర్శకత్వంలో మరో సినిమాని లాంచ్ చేస్తారట.
ఈ రెండు చిత్రాలు కూడా వచ్చే ఏడాది విడుదల అవుతాయి. ఇవి కాకుండా ఇంకా మరో సినిమా కూడా సెట్ పైకి వచ్చే ఏడాది తీసుకెళ్తారట.
