పాన్ ఇండియా చిత్రాల నిర్మాత!

AM Ratnam

“మనం ఇప్పుడు బహు బాషా చిత్రాలు… పాన్ ఇండియా మూవీస్ అందిస్తున్నాం… ఒక విధంగా ఇందుకు దశాబ్దానికి ముందే నాంది పలికిన నిర్మాత శ్రీ ఎ.ఎమ్.రత్నం గారు. తెలుగు, తమిళ భాషల్లో ఆయన నిర్మించిన చిత్రాలు హిందీ ప్రేక్షకులకు చేరువయ్యేలా.. ఏ భాష ప్రేక్షకులనైనా మెప్పించేలా ఉండేవి,” అన్నారు ప్రముఖ కథానాయకులు, జనసేన అధ్యక్షులు ‘పవర్ స్టార్’ శ్రీ పవన్ కల్యాణ్.

‘భారతీయుడు’ సినిమాను ‘ఇండియన్’గా బాలీవుడ్ లో విడుదల చేస్తే సంచలన విజయం సాధించి దక్షిణాది చిత్రాలు, మన దర్శకుల శైలి, మన స్టార్ హీరోల మార్కెట్ సత్తా గురించి అందరూ మాట్లాడుకున్నారు. ఆ విధంగా తెలుగు, తమిళ చిత్రాల మార్కెట్ పరిధిని విస్తరింపచేయడంలో రత్నం పాత్ర మరువలేనిది.

గురువారం ఎ.ఎమ్.రత్నం జన్మదినం సందర్భంగా హైదరాబాద్ లో పవన్ కల్యాణ్ పుష్పగుచ్చం ఇచ్చి శుభాకాంక్షలు తెలియచేశారు.

“ఎవరినీ కూడా నాతో సినిమా చేయమని అడగలేదు. నేను హీరోగా వచ్చిన తొలి రోజుల్లో ఒక్క రత్నం గారిని మాత్రమే అడిగాను. ఆయనతో ఎప్పటి నుంచో పరిచయం ఉంది. రత్నం గారి బంధువు ఒకరు నాకు నెల్లూరులో సన్నిహిత మిత్రుడు. అలా రత్నం గారిని చెన్నైలో కలుస్తూ ఉండేవాణ్ణి. అప్పుడే అడిగాను. సినిమా చేయమని. నాకు మరచిపోలేని హిట్ ‘ఖుషీ’ ద్వారా ఆయన ఇచ్చారు. సినిమా నిర్మాణం పట్ల ఆయనలో ఒక తపన కనిపిస్తుంది. సినిమా వ్యాపార విస్తృతి తెలిసిన నిర్మాత ఆయన. సినిమాలో కళాత్మకత ఎక్కడా తగ్గకుండానే వాణిజ్య అంశాలను, ఆధునిక సాంకేతికత మేళవించి అందించడం ద్వారా మార్కెట్ పరిధి పెంచారు. ఆయన నిర్మించే చిత్రాల్లో ప్రేక్షకుల అభిరుచికి తగ్గ అన్ని అంశాలూ ఉంటాయి… అవి ఏ భాషవారికైనా నచ్చేలా ఉంటాయి. మరిన్ని విజయాలను అందుకోవాలి” అని ఆకాంక్షించారు.

రత్నం ఇప్పుడు పవన్ కళ్యాణ్ హీరోగా సినిమా నిర్మిస్తున్నారు. క్రిష్ దానికి దర్శకుడు.

More

Related Stories