మహేష్ బాబు – రాజమౌళి సినిమాకి “వారణాసి” అనే టైటిల్ ఖరారు అయింది అని ఆ మధ్య సోషల్ మీడియాలో తెగ హడావిడి జరిగింది. ముఖ్యంగా మహేష్ బాబు అభిమానులు ఎక్కువగా ఆ వార్తని సోషల్ మీడియాలో పోస్ట్ చేశారు. ప్రస్తుతానికి ఈ సినిమాని “గ్లోబల్ ట్రాటర్” అని పిలుస్తున్నారు. కానీ సినిమాకి అసలైన టైటిల్ ఏంటనేది ఈ నెల 15న తెలుస్తుంది.
రామోజీ ఫిలిం సిటీలో ఈ నెల 15న టైటిల్ గ్లిమ్ప్స్ విడుదల కార్యక్రమం పెట్టుకొంది టీం. అప్పటివరకు ఏ పేర్లు ప్రచారంలోకి వచ్చినా అవి ఊహాగానాలే.
ఇక తాజాగా రామభక్త హనుమ క్రియేషన్స్ బ్యానర్లో రూపొందుతోన్న ఒక చిన్న చిత్రానికి “వారణాసి” అనే పేరు పెట్టి, దాని రిజిస్టర్ చేయించి పోస్టర్ వదిలారు. త్వరలోనే ఈ సినిమా ప్రారంభిస్తామని ఆ టీం ప్రకటించింది. ఒకవేళ ఈ సంస్థ నిజంగానే “వారణాసి” అనే టైటిల్ రిజిస్టర్ చేయించి ఉంటే రాజమౌళి సినిమాకి ఆ పేరు పెట్టుకోవడం కుదరదు. లేదా ఈ సంస్థ నుంచి రాజమౌళి టీం టైటిల్ కొనుక్కోవాలి.
ఇంతకీ రాజమౌళి ఇదే టైటిల్ అనుకుంటున్నారా లేక ఇంతకుముందు పరిశీలించిన “మహారాజ్” టైటిల్ పెడుతారా. సస్పెన్స్ వీడాలంటే నవంబర్ 15 వరకు ఆగాల్సిందే.
