వచ్చే నెల పూర్తి చేస్తారా?

పవన్ కళ్యాణ్ రాజకీయ నేతగా బిజీగా ఉన్నారు. ఒక రోజు ఎదో ఒక దీక్ష అని ఓ కేరళలో కనిపిస్తారు. మరో రోజు తమిళనాడుకి వెళ్తారు. ఒక నాడు కుంభమేళాలో దర్శనమిస్తారు. ఇంకోనాడు అపోలో హాస్పిటల్ లో చికిత్స చేయించుకుంటూ హైదరాబాద్ లో అగుపిస్తారు. ఇప్పుడు ఏపీ అసెంబ్లీలో ఉన్నారు. నిత్యం బిజీ బిజీ.

బీజేపీ మిత్రపక్ష కూటమిలో కీలక నాయకుడిగా ఎదిగిన పవన్ కళ్యాణ్ కి ఇప్పుడు తీరిక లేదు. సినిమాలు చెయ్యాల్సిన అవసరమూ లేదు. కాకపోతే, ఒప్పుకున్న చిత్రాల షూటింగ్ లు పూర్తి చెయ్యాల్సిన బాధ్యత ఉంది. ముఖ్యంగా ఆయన విడుదలకి సిద్ధంగా ఉన్న “హరి హర వీర మల్లు” చిత్రం పూర్తి చెయ్యాలి.

ఈ సినిమాకి సంబంధించి మిగిలిన 10 రోజుల పని కంప్లీట్ చెయ్యాలి. ఆ డేట్స్ మాత్రం పవన్ కళ్యాణ్ ఇవ్వడం లేదు. ఇప్పటికే పవన్ కళ్యాణ్ డూప్ తో చాలా వరకు లాగారు. కానీ కొన్ని కీలకమైన సన్నివేశాలకు పవన్ కళ్యాణ్ షూటింగ్ కి వెళ్లాల్సిందే. వచ్చే నెల మొదటి వారంలో ఆ మిగిలిన భాగాన్ని పూర్తి చేస్తామని నిర్మాత నమ్మకంగా ఉన్నారు.

అది పూర్తి అయితే “హరి హర వీర మల్లు” ఈ వేసవిలో విడుదల అవుతుంది. ఈ సినిమాకి సంబంధించి ప్రమోషన్స్ మాత్రం జరుగుతున్నాయి. ఇప్పటికే రెండు పాటలు విడుదల అయ్యాయి.