Allu Cinemas: అల్లుకి నచ్చినోళ్లే గ్రేట్!

అల్లు అర్జున్ – అల్లు అరవింద్ కుటుంబం తాజాగా అల్లు సినిమాస్ (Allu Cinemas) పేరుతో హైదరాబాద్ లోని కోకాపేట సమీపంలో భారీ మల్టిప్లెక్స్ ప్రారంభించింది. ఆ ఆవరణలో గొప్ప దర్శకులు అంటూ కొన్ని భారీ ఫోటోలు ప్రదర్శించారు. ఈ ఫోటోలు ఎప్పుడూ ఉంటాయి.

ఐతే, ఈ ఫోటోల విషయంలో ఇప్పుడు సోషల్ మీడియాలో రచ్చ జరుగుతోంది. రాజమౌళి, త్రివిక్రమ్, సుకుమార్, మణిరత్నం, ప్రశాంత్ నీల్, రిషబ్ శెట్టి, వెట్రిమారన్, అట్లీ, రాజ్ కుమార్ హిరానీ ఇలా పలువురు దర్శకుల ఫోటోలు ఉన్నాయి. ఇందులో శంకర్ ఫోటో లేదు, రామ్ గోపాల్ వర్మ లేరు.

మూడు, నాలుగు ఫక్తు కమర్షియల్ చిత్రాలు తీసిన అట్లీ ఎలా గొప్ప దర్శకుడు అయ్యాడు? అట్లీ గురువు శంకర్ మాత్రం ఎందుకు లెజెండ్ లిస్ట్ లోకి రాలేదు. ఒక్క కాంతర సినిమాకే రిషబ్ శెట్టి గొప్ప దర్శకుడు అయిపోయాడా? ఇలా రకరకాల కామెంట్స్ వస్తున్నాయి.

అల్లుతో పనిచేసిన దర్శకులు, పనిచెయ్యాలనుకుంటున్న దర్శకుల లిస్ట్ కాబోలు ఇది అని మరికొందరు అంటున్నారు. అల్లుకి నచ్చినోళ్లే గ్రేటా అని మరికొందరు ఈసడించుకుంటున్నారు. ఐతే, ఇది పక్కాగా వాళ్ళ సొంత మల్టిప్లెక్స్… పబ్లిక్ ప్రాపర్టీ కాదు, వాళ్లకు నచ్చినట్లు పెట్టుకోవచ్చు అనే మాట కూడా వినిపిస్తోంది.