దసరా విలన్ కు చిన్న ఊరట

ఒకేసారి 2 పెద్ద వివాదాల్లో కూరుకుపోయాడు నటుడు షైన్ టామ్ చాకో. అతడిపై మలయాళ నటి విన్సీ, కాస్టింగ్ కౌచ్ ఆరోపణలు చేసింది. పనిలోపనిగా డ్రగ్స్ ఆరోపణలు కూడా చేసింది. సెట్స్ లో అతడు డ్రగ్స్ తీసుకున్నాడని, ఆ తర్వాత తనతో మిస్-బిహేవ్ చేశాడంటూ ఆమె తెలిపింది.

ఆమె ఆరోపించిన కొన్ని రోజులకే టామ్ పై దాడులు జరిగాయి. అతడున్న ఓ హోటల్ పైకి యాంటీ నార్కోటిక్స్ బ్యూరో అధికారులు దాడి చేశారు. పక్కా సమాచారంతో, నటుడు దాడి కంటే కొంచెం ముందు ఆ స్పాట్ నుంచి ఎస్కేప్ అయ్యాడు.

మూడో అంతస్తు నుంచి రెండో అంతస్తులోకి దూకి, అట్నుంచి అటు పారిపోయాడు. ఆ తర్వాత పోలీసు విచారణకు హాజరవ్వడం, పోలీసులు అతడ్ని అరెస్ట్ చేయడం, బెయిల్ పై విడుదలవ్వడం అన్నీ చకచకా జరిగిపోయాయి.

ఇలా 2 వివాదాల్లో ఇరుక్కున్న టామ్ పై తను లీగల్ యాక్షన్ తీసుకోనని స్పష్టం చేసింది నటి విన్సీ. ఈ సమస్యపై తను కోర్టుకు వెళ్లడం లేదని, అంతర్గతంగానే తేల్చుకుంటానని ఆమె తెలిపింది. మలయాళ ఫిలిం ఛాంబర్-‘అమ్మ’ కు ఇచ్చిన ఫిర్యాదును మాత్రం వెనక్కు తీసుకునేది లేదని తేల్చి చెప్పేసింది.