తమన్న సినిమాపై పోలీస్ కేసు?

‘ఓదెల-2’ విడుదలైన వెంటనే అందులోని ఓ అభ్యంతరకరమైన సన్నివేశంపై కొంతమంది అనుమానం వ్యక్తం చేశారు. అదే నిజమైంది. ఈ సినిమాలో ‘పిచ్చగుంట్ల’ అనే పదాన్ని తప్పుగా వాడారు. దీంతో ఆ కులస్తులు మండిపడ్డారు.

ముందుగా అత్తాపూర్ పోలీస్ స్టేషన్ లో ఫిర్యాదు చేశారు. పోలీసులు కంప్లయింట్ తీసుకున్నారు కానీ ఎఫ్ఐఆర్ నమోదు చేయలేదని ఆరోపించారు. తర్వాత వీళ్లు బీసీ కమిషన్ ను ఆశ్రయించారు. బీసీ కమిషన్ చొరవతో ఈ కేసులో కదలిక వచ్చింది.

సినిమాపై విచారణ జరిపించాలంటూ తెలంగాణ డీజీపీని ఆదేశించింది బీసీ కమిషన్. అలానే సెన్సార్ బోర్డును కూడా ప్రశ్నించింది. దీనిపై వెంటనే స్పందించిన సెన్సార్ బోర్డు… ఆ అభ్యంతరకర పదాన్ని తొలిగిస్తామని ప్రకటించింది.

తమన్నా లీడ్ రోల్ లో నటించిన ‘ఓదెల-2’ భారీ అంచనాల మధ్య రిలీజైంది. ట్రయిలర్ తో సినిమాకు ఊపొచ్చింది. కానీ థియేటర్లలోకి వచ్చిన తర్వాత ఈ మూవీ ఆ స్థాయిలో నిలబడలేకపోయింది. సినిమా సరిగ్గా ఆడలేదనే బాధకు తోడు నిర్మాతలకు ఇప్పుడిదో తలనొప్పి.