మళ్లీ చంద్రబాబుతోనే Unstoppable

ఈసారైనా చిరంజీవి వస్తారని అంతా ఆశపడ్డారు. అల్లు అర్జున్ ను తీసుకొచ్చి పుష్ప-2కు మరింత బజ్ తెస్తారని అనుకున్నారు. కనీసం ప్రభాస్ నైనా రిపీట్ చేస్తారని భావించారు. కానీ ‘ఆహా’ నిర్వహకులు మాత్రం ఏపీ సీఎం చంద్రబాబును రిపీట్ చేశారు.

బాలకృష్ణ హోస్ట్ గా చేస్తున్న “అన్ స్టాపబుల్ సీజన్-4” (Unstoppable 4) మొదటి ఎపిసోడ్ లో చంద్రబాబు ప్రత్యేక అతిథిగా కనిపించబోతున్నారు. అలా అని ఇదేదో ఫ్రెష్ కాంబినేషన్ కాదు. సీజన్-2లోనే చంద్రబాబును తీసుకొచ్చారు. స్పెషల్ ఎట్రాక్షన్ గా లోకేష్ ను కూడా కూర్చోబెట్టారు.

ఇప్పుడు మరోసారి చంద్రబాబును రిపీట్ చేశారు. అన్ స్టాపబుల్ కు గెస్టుల కొరత ఉందనే టాక్ చాన్నాళ్లుగా నడుస్తోంది. ఇప్పుడు చంద్రబాబును పిలిచి ఆ టాక్ ను నిజం చేశారు ‘ఆహా’ మేకర్స్.

ఇక్కడ గమనించాల్సిన ముఖ్య విషయం ఏంటంటే.. అన్ స్టాపబుల్ కు రాజకీయ నాయకుల్ని పిలిచిన ప్రతిసారి వ్యూస్ తగ్గాయి. బజ్ కూడా తగ్గింది. ఈ విషయం తెలిసి కూడా మరోసారి చంద్రబాబును కూర్చోబెట్టడం వెనక ఆంతర్యం ఏంటో మేకర్స్ కే తెలియాలి. October 25న బాలకృష్ణ-చంద్రబాబు ఎపిసోడ్ టెలికాస్ట్ అవుతుంది.