“లూసిఫర్” రీమేక్ ఆగిపోయిందని ఆ మధ్య పుకార్లు షికార్లు చేశాయి. ఆ తర్వాత దర్శకుడు మోహన్ రాజా ఈ ప్రాజెక్ట్ నుంచి తప్పుకున్నాడని ప్రచారం జరిగింది. ఐతే, ఈ రెండూ తప్పని ఇటీవలే తెలుగుసినిమా.కామ్ ప్రచురించింది.
ఇప్పుడు అదే విషయాన్ని మెగాస్టార్ చిరంజీవి టీం క్లారిటీగా చెప్పింది. ఈ రోజు దర్శకుడు మోహన్ రాజా పుట్టిన రోజు. ఈ సందర్భంగా కొణిదెల ప్రొడక్షన్, మెగా సూపర్ గుడ్ ఫిలిమ్స్ సంస్థలు తమ దర్శకుడికి బర్త్ డే విషెస్ తెలిపాయి.
“మా #చిరు153 దర్శకుడికి పుట్టిన రోజు శుభాకాంక్షలు…” అని పోస్టర్స్ ని సోషల్ మీడియాలో రిలీజ్ చేశాయి. అలా అధికారికంగా ఈ సినిమా గురించి మరోసారి క్లారిటీ ఇచ్చాయి నిర్మాణ సంస్థలు.
మలయాళంలో సూపర్ హిట్టయిన “లూసిఫర్” సినిమాని మెగాస్టార్ చిరంజీవి హీరోగా రీమేక్ చేస్తున్నారు. ఈ సినిమాని ఇప్పటికే అధికారికంగా లాంచ్ చేశారు. ఐతే, లాంచ్ చేసి చాలా కాలమే అయినా షూటింగ్ మొదలు కావట్లేదు. దాంతో చాలామందికి అనుమానాలు మొదలయ్యాయి. అందుకే, ఇన్ని పుకార్లు, ఊహాగానాలు.
ఈ సినిమా షూటింగ్ మొదలు కావాలంటే… ముందుగా కొరటాల శివ తీస్తున్న ‘ఆచార్య’ పూర్తి కావాలి. కోవిడ్ 19 సంక్షోభం వల్ల ‘ఆచార్య’ షూటింగ్ కి రెగ్యులర్ గా బ్రేకులు పడుతున్నాయి. దాంతో ‘లూసిఫర్ రీమేక్’ షూటింగ్ కూడా స్టార్ట్ కావడం లేదు.
