వెంకటేష్ (Venkatesh), త్రివిక్రమ్ (Trivikram) కాంబినేషన్ లో రూపొందుతోన్న మొదటి చిత్రం…ఆదర్శ కుటుంబం (Aadarsha Kutumbam). ఈ సినిమా వేగంగా పూర్తి చేసి విడుదల చెయ్యాలనే లక్ష్యంతో మొదలుపెట్టారు త్రివిక్రమ్. కానీ అనుకోకుండా ఆలస్యం అయింది. అంతే కాదు, ఈ సినిమా ఈ ఏడాది కూడా రాదు అని టాక్ మొదలైంది.
ఈ సినిమా స్టోరీ పాయింట్, కొన్ని సన్నివేశాలు ఒక హాలీవుడ్ చిత్రానికి కాపీ అని చాలా కాలంగా గుసగుసలు వినిపిస్తున్నాయి. ఐతే, ఇటీవల అర్జున్, ప్రీతి ముకుందన్, అభిరామి నటించిన తమిళ్ చిత్రం “బ్లాస్ట్” విడుదల తర్వాత మరో ప్రచారం మొదలైంది. ఈ “బ్లాస్ట్” తమిళనాడులో బాగా ఆడింది. తెలుగులో డబ్ ఓకె అనిపించుకొంది. ఈ ‘బ్లాస్ట్’ కథని కూడా త్రివిక్రమ్ స్ఫూర్తిగా తీసుకున్న హాలీవుడ్ చిత్రం నుంచే లేపారంట. అంటే త్రివిక్రమ్ స్ఫూర్తి పొందకముందే ఆ తమిళ దర్శకుడు “ఇన్ స్పైర్” అయి తీశాడు.
దాంతో త్రివిక్రమ్ ఇప్పుడు తన సినిమాలో కొన్ని మార్పులు చేర్పులు చేస్తున్నారు అని టాక్ మొదలైంది. అందుకే, ఈ సినిమా ఈ ఏడాది విడుదల కావడం కష్టమే అని ప్రచారం జరుగుతోంది.
దర్శకుడు అనిల్ రావిపూడి ఇటీవలే వెంకటేష్ తో ఒక సినిమా మొదలుపెట్టారు. ఈ సినిమా షూటింగ్ సంక్రాంతికి విడుదల కానుంది. ఆ సినిమా కన్నా ముందే “ఆదర్శ కుటుంబం” విడుదల కావాలి. లేదంటే పరువు పోతుంది. అందుకే, తమ సినిమా వచ్చే ఏడాదికి వాయిదా పడలేదని త్రివిక్రమ్ టీం చెప్తోంది. ఈ గాంధీ జయంతికి సినిమాని తీసుకొచ్చేందుకు ప్రయత్నిస్తున్నారట.
