అందాల నిధి (Nidhhi Agerwal)కి పేరుకు తగ్గట్టుగానే అందాల గని ఉంది. కానీ ఆమెకు ఆవగింజంత అదృష్టం కూడా లేదు. 2 భారీ చిత్రాలు చేసింది, ఆ రెండు సినిమాలతో ఓ వెలుగు వెలుగుదాం అనుకుంది. కానీ దురదృష్టవశాత్తూ రెండూ ఫ్లాప్ అయ్యాయి.
దీంతో ఆమెపై సోషల్ మీడియాలో ఓ రేంజ్ లో ట్రోలింగ్ నడిచింది. ‘ఐరెన్ లెగ్’ అంటూ చాలామంది ఆమెను ఆడిపోసుకున్నారు. అలా చాలా ట్రోలింగ్ భరించిన నిధి అగర్వాల్ ఎట్టకేలకు తనపై నడిచిన తిట్ల దండకంపై స్పందించింది.
“నేను ఎప్పుడూ పొగడ్తల్ని తలకెక్కించుకోలేదు, అదే విధంగా ట్రోలింగ్స్ ను కూడా పట్టించుకోలేదు.” అనేది నిధి అగర్వాల్ సమాధానం. ఓ సినిమా ఫ్లాప్ ను ఒకరికే ఆపాదించడం ఎంతవరకు కరెక్ట్ అంటూ ప్రశ్నించిన నిధి, తను అదృష్టం కంటే కష్టాన్నే నమ్ముకున్నానని తెలిపింది.
‘హరిహర వీరమల్లు’ సినిమా కోసం దాదాపు మూడేళ్లు కేటాయించింది నిధి. ఆ తర్వాత ‘రాజాసాబ్’ కోసం మరింత సమయం కేటాయించింది. రెండు ప్రతిష్టాత్మక చిత్రాలే కానీ రెండూ పరాజయం పాలయ్యాయి. సినిమా ఏదైనా తను వంద శాతం కష్టపడతానని, ఫలితం తన చేతిలో ఉండదని అంటోంది నిధి.
