రామ్ చరణ్ (Ram Charan) హీరోగా నటించిన “పెద్ది” (Peddi) సినిమా మరో మూడు రోజుల్లో మన ముందుకు రానుంది. తెలుగునాట కళ్ళు చెదిరే ఓపెనింగ్ రాబట్టుకునేలా ఉంది. సినిమాకి సూపర్ హైప్ వచ్చింది. ఐతే, తెలుగులో ఓపెనింగ్ బాగుంటుంది, సినిమా బాగుంటే రెండు వారాలు కుమ్మి పారేస్తుంది అని కచ్చితంగా చెప్పొచ్చు. మరి హిందీ పరిస్థితి ఏంటి?
ఇప్పటికే హిందీ కోసం ఢిల్లీలో ఈవెంట్, భోపాల్ లో ఈవెంట్, ముంబై లో ప్రెస్ మీట్ పెట్టి రామ్ చరణ్ ప్రచారం చేశాడు. ఐతే, పెద్ది హిందీ ట్రైలర్ కి పెద్ద ఊపు రాలేదు. స్పందన కూడా తక్కువే ఉంది అని యూట్యూబ్ మిలియన్ వ్యూస్ చెప్తున్నాయి.
ఐతే, హిందీ మార్కెట్ లో ఓపెనింగ్ రోజు వచ్చే కలెక్షన్లు తక్కువే ఉన్నా ఆ తర్వాత ఊపందుకొని కళ్ళు చెదిరే హిట్స్ కొట్టిన సినిమాల లిస్ట్ పెద్దదే పుష్ప సినిమాకి అలాగే జరిగింది. ధురంధర్ చిత్రం విషయంలోనూ అదే జరిగింది. ఐతే మొదటి వీకెండ్ కనీసం గౌరవప్రదమైన అమౌంట్ పోస్ట్ చేసి, మంచి టాక్ తెచ్చుకుంటే ఓవరాల్ కలెక్షన్లు భారీగా ఉంటాయి. పెద్ది విషయంలో అలాగే జరుగుతుంది అని నిర్మాతల నమ్మకం.
మొదటి రోజు భారీ ఓపెనింగ్ రాకపోయినా… సినిమా విడుదలైన తర్వాత టాక్ తో సూపర్ గా పుంజుకుంటుంది అని భావిస్తోంది ఈ సినిమా టీం.
ఒక్క తెలుగు మార్కెట్ కలెక్షన్లతో ఈ సినిమా బడ్జెట్ ని రాబట్టుకోవడం కష్టం. అలాగే తెలుగులో మాత్రమే పెద్ద హిట్ ఐతే కలెక్షన్ మొత్తం మూడు, నాలుగు వందలే కనిపిస్తుంది. 800, 1000 కోట్ల భారీ అమౌంట్ కనపడాలంటే హిందీ మార్కెట్ కీలకం.
