కొన్ని సినిమాల విషయంలో నటీనటుల ప్రమేయం లేకుండానే కొంత జరిగిపోతుంది. ఇతరుల బలవంతం వల్ల కొన్ని సినిమాలు, మొహమాటానికి మరికొన్ని సినిమాలు చేయాల్సి ఉంటుంది. ప్రతి నటుడి కెరీర్ లో అలాంటి సినిమాలుంటాయి. నటుడు వేణు తొట్టెంపూడి (Venu Tottempudi) కెరీర్ లో కూడా అలాంటి ఓ సినిమా ఉంది.
రీఎంట్రీ కోసం బాగా ఎదురుచూస్తున్న టైమ్ లో ‘రామారావు ఆన్ డ్యూటీ’ కథ వేణు వద్దకు వచ్చింది. ఆ సినిమా దర్శకుడు శరత్, నిర్మాత వచ్చి కలిసినప్పుడు వేణు పెద్దగా ఆసక్తి చూపించలేదంట. అంతకంటే మంచి పాత్ర దొరికితే రీఎంట్రీ ఇద్దామనుకున్నాడట.
అయితే ఓసారి ఆఫీస్ కు రమ్మని పిలిచారంట. పాత్ర మొత్తం చెప్పి మీరు తప్పకుండా నటించాల్సిందే అంటూ కాస్త గట్టిగా చెప్పారంట. దీంతో మొహమాటానికి పోయి అందులో నటించాడంట వేణు.
రవితేజ హీరోగా నటించిన ‘రామారావు ఆన్ డ్యూటీ’ ఫ్లాప్ అయింది. హీరో రవితేజకు, రీఎంట్రీ ఇచ్చిన వేణుకు అది బొత్తిగా కలిసిరాలేదు. ఆ దెబ్బతో మళ్లీ గ్యాప్ తీసుకున్న వేణు, ఇప్పుడు మరో సినిమా రెడీ చేస్తున్నాడు. ఈసారి అన్నీ తానై సినిమా చేస్తున్నాడు.
