సూర్య (Suriya) లేటెస్ట్ మూవీ ‘కరుప్పు’ (Karuppu. తెలుగులో దీన్ని ‘వీరభద్రుడు’ IVeera Bhadrudu) పేరిట రిలీజ్ చేస్తున్నారు. తాజాగా ఈ సినిమా ప్రచారాన్ని మళ్లీ మొదలుపెట్టారు. మే 14న తెలుగు, తమిళ భాషల్లో ఒకేసారి ఈ చిత్రాన్ని విడుదల చేయడానికి సన్నాహాలు చేస్తున్నారు.
ఈ క్రేజీ ప్రాజెక్ట్ను తెలుగులో ప్రముఖ నిర్మాణ సంస్థ అన్నపూర్ణ స్టూడియోస్ విడుదల చేస్తోంది. అక్కినేని నాగార్జున నేతృత్వంలో ఈ సంస్థకు ఉన్న డిస్ట్రిబ్యూషన్ నెట్వర్క్, ‘వీరభద్రుడు’కు ప్లస్ అవుతుందని భావిస్తున్నారు. నాణ్యమైన చిత్రాలను ప్రేక్షకులకు అందించడంలో అన్నపూర్ణ స్టూడియోస్ ఎప్పుడూ ముందుంటుంది. ఇలాంటి సంస్థ నుంచి ‘వీరభద్రుడు’రిలీజ్ అవుతుండడంతో తెలుగులో ఈ ప్రాజెక్టుకు ఇంకాస్త వెయిట్ పెరిగింది.
తెలుగులో ప్రస్తుతం డ్రై సీజన్ నడుస్తోంది. థియేటర్లలో గట్టిగా నిలబడిన సినిమా ఒక్కటి కూడా లేదు. ఇలాంటి టైమ్ లో వస్తున్న ‘వీరభద్రుడు’, ఈ అడ్వాంటేజ్ ను క్యాష్ చేసుకుంటాడో లేదో చూడాలి. అటు ప్రచారం పెద్దగా లేకపోవడంతో, సినిమాపై బజ్ తక్కువగా ఉంది. చాలామందికి ఈ సినిమా వచ్చే వారం రిలీజ్ అవుతుందనే విషయం కూడా తెలియదు.
దీనికితోడు సూర్యకు తెలుగులో ఉన్న ట్రాక్ రికార్డ్ కూడా అంతంతమాత్రం. ఇవన్నీ దాటుకొని ‘వీరభద్రుడు’ విజయం సాధించాల్సి ఉంది. త్రిష హీరోయిన్ గా నటించిన ఈ సినిమాకు ఆర్జే బాలాజీ దర్శకుడు. సయీ అభ్యంకర్ సంగీత దర్శకుడు.
