సూర్య నటించి, నిర్మించిన ‘జై భీమ్’ చిత్రం విమర్శకుల ప్రశంసలు అందుకొంది. సామాన్య ప్రేక్షకులను కూడా మెస్మరైజ్ చేసింది. అమెజాన్ ప్రైమ్ లో డైరెక్ట్ గా విడుదలైన ఈ మూవీ దేశమంతా హాట్ టాపిక్ గా మారింది. ఐతే, తమిళనాట మాత్రం రాజకీయ దుమారం రేపుతోంది.
తమిళనాడులో ‘వన్నియార్’ అనే సామాజికవర్గం వారిని కించపరిచేలా ఈ సినిమాలో సన్నివేశాలను పెట్టారని ఆ కుల సంఘ ప్రతినిధులు అభ్యంతరం వ్యక్తం చేశారు. ఆ తర్వాత ఈ సినిమాకి వ్యతిరేకంగా పీఎంకే అనే పార్టీ ఉద్యమం మొదలుపెట్టింది. ఈ పార్టీకి వన్నియార్ కులానికి సంబంధం ఉంది. చిలికి చిలికి ఈ వివాదం ఇప్పుడు పెద్ద రాజకీయ రచ్చకి దారితీయడంతో సూర్య ఇప్పటికే వివరణ ఇచ్చారు.
తమిళనాడులో సూర్య సినిమాలను నిషేధిస్తామని పీఎంకే పార్టీ హెచ్చరికలు జారీచేసేవరకు వచ్చింది పరిస్థితి. దాంతో, సూర్యకి మద్దతుగా నిలుస్తున్నారు పలువురు సెలెబ్రిటీలు. ఐ స్టాండ్ విత్ సూరియా అనే హాష్టాగ్ కూడా ట్రెండ్ అవుతోంది ట్విట్టర్లో.
సూర్య మాత్రం తాను క్షమాపణలు చెప్పేది లేదని తెగేసి చెప్పారు. సినిమా కథ నిజంగా జరిగిన ఘటనల ఆధారంగా రూపొందినది. అందుకే, ఈ విషయంలో సూర్య వెనకడుగు వెయ్యట్లేదు. అధికార పార్టీ డీఎంకే కూడా సూర్యకి మద్దతిస్తోంది.
