పవన్ కళ్యాణ్ మాజీ భార్య రేణు దేశాయ్ మళ్ళీ మేకప్ వేసుకుంటున్నారు అనే వార్త పాతదే. ఆమె తనకి అవకాశం ఇచ్చిన దర్శకుడికి థాంక్స్ కూడా చెప్పిందని ఇటీవలే తెలుగుసినిమా.కామ్ రాసింది. ఇప్పుడు ఆ సినిమా నుంచి మొదటి లుక్ వచ్చింది.
రవితేజ కథానాయకుడిగా వంశీ దర్శకత్వంలో అభిషేక్ అగర్వాల్ నిర్మిస్తున్న సినిమా… టైగర్ నాగేశ్వరరావు. 1970 నాటి స్టువర్ట్‌పురం దొంగల నేపధ్యంలో సాగే మూవీ ఇది. ఈ చిత్రంలో రేణు దేశాయ్ హేమలత లవణం అనే పవర్ ఫుల్ పాత్రను పోషిస్తున్నారు. హేమలత లవణం సామాజిక అసమానతల, సాంఘిక దురాచారాలకు వ్యతిరేకంగా పోరాడారు. ఆ పాత్రలో రేణు కనిపిస్తారు.
ఆమె పాత్రను పరిచయం చేస్తూ మేకర్స్ ఈ రోజు ఒక చిన్న వీడియో గ్లింప్స్ ని విడుదల చేశారు.
వీడియోలో రేణు దేశాయ్ తెల్లచీరలో కనిపించే మరో ఇద్దరు మహిళా కార్యకర్తలతో కలిసి రోడ్డుపై నడుస్తూ పవర్ ఫుల్ ఎంట్రీ ఇచ్చారు. ఈ సినిమాలో రవితేజ సరసన నూపూర్ సనన్, గాయత్రి భరద్వాజ్ హీరోయిన్లుగా నటిస్తున్నారు. తెలుగు, తమిళ, కన్నడ, మలయాళ, హిందీ భాషల్లో ఈ మూవీ విడుదల కానుంది.
