కృతి సనన్ (Kriti Sanon)ని మొదట్లో గ్లామర్ క్వీన్ అన్నారు. అందం తప్ప నటన శూన్యం అన్న కామెంట్స్ పడ్డవి అప్పట్లో. నిజంగానే ఆమెకి అప్పట్లో పెద్దగా నటన వచ్చేది కాదు. కానీ కష్టపడి తన స్కిల్స్ ని పెంచుకొంది. “మిమి” (2021) సినిమాకి ఉత్తమ నటిగా జాతీయ అవార్డు కూడా పొందింది. ఇప్పుడు ఆమె నటనకు మంచి మార్కులే పడుతున్నాయి.
ఐతే నటిగా ఇంకా ప్రూవ్ చేసుకోవాలని అనుకుంటోంది.
హాలీవుడ్ నటి రోజ్ మండ్ పైక్ “గాన్ గర్ల్” చిత్రంలో చేసినటువంటి పాత్ర చెయ్యాలని ఉంది అని ఆమె తెలిపింది. ఇప్పటివరకు సాదాసీదా అమ్మాయిగానే నటించింది. కానీ ఇప్పుడు కొంచెం విలనీతో కూడిన హీరోయిన్ పాత్రలు చేసి తన నటనలో చాలా వైవిధ్యం ఉందని చాటి చెప్పాలని ప్రయత్నిస్తోంది.
నటిగా ఇంకా సాధించాలనే ఉద్దేశంతోనే తన పెళ్లి కూడా వాయిదా వేసుకొంది. ఆమె ఒక వ్యాపారవేత్తతో డేటింగ్ లో ఉంది. అతన్ని పెళ్లి చేసుకోబోతుంది అని వార్తలు వచ్చాయి. కానీ తన చెల్లెలు నుపుర్ సనన్ పెళ్లి చేసింది కానీ తాను ఇంకా సింగిల్ గానే ఉంది కృతి. తన పెళ్లికి ఇంకా టైం ఉంది అంటోంది. ప్రస్తుతం నటిగా మరింత ప్రూవ్ చేసుకోవాలి అనుకుంటోంది.
