తమిళ సూపర్ స్టార్ విజయ్ నటించిన ‘జన నాయకుడు’ (తమిళంలో జన నయగన్) తాజాగా ప్రేక్షకుల ముందుకు వచ్చింది. అయితే ఈ సినిమాలో తన సన్నివేశాలను పూర్తిగా తొలగించారని నటి ఆనంది అజయ్ (Anandhi Ajay) భావోద్వేగానికి గురయ్యారు.
ఇన్స్టాగ్రామ్లో విడుదల చేసిన ఓ వీడియోలో ఆమె కన్నీటి పర్యంతమయ్యారు. ఈ సినిమా కోసం తాను దాదాపు ఏడాది పాటు కష్టపడ్డానని చెప్పారు. విజయ్ చివరి చిత్రంలో ఆయనతో కలిసి నటించే అవకాశం రావడం తనకు ఎంతో ఆనందంగా అనిపించిందని, కానీ చివరకు తన పాత్రకు సంబంధించిన సన్నివేశాలన్నీ తొలగించడంతో తీవ్ర నిరాశకు గురయ్యానని తెలిపారు.
ప్రస్తుతం ఆమె వీడియో సోషల్ మీడియాలో వైరల్గా మారింది. నెటిజన్లు ఆమెకు మద్దతుగా స్పందిస్తున్నారు.
సెన్సార్ సూచనల మేరకు ‘జన నాయకుడు’ చిత్రంలో పలు మార్పులు చేసిన విషయం తెలిసిందే. సెన్సార్ బోర్డు మొత్తం 12 కీలక మార్పులను సూచించడంతో, ఆ ప్రక్రియలోనే ఆనంది సన్నివేశాలు తొలగించి ఉండొచ్చ అని అంటున్నారు. ఆ మాటకొస్తే హీరోయిన్ పూజ హెగ్డే సీన్లు కూడా చాలా కట్ చేశారు. సెకండాఫ్ లో ఒక రెండు సీన్లలో తప్ప పూజ కనిపించదు. హీరోయిన్ సీన్లే తీసేసినప్పుడు ఈ చిన్న నటి సీన్లు తొలగించడంలో ఆశ్చర్యం లేదు.
తమిళనాట విజయ్ కి ఉన్న క్రేజ్ తెలిసిందే. ఇప్పుడు ఆయన ముఖ్యమంత్రి. విజయ్ చివరి చిత్రంలో కనిపిస్తే తన కెరీర్ మలుపు తిరుగుతుందని భావించింది ఆనంది అజయ్. టీవీ నటిగా పేరున్న ఈ భామ ఈ సినిమాపై చాలా ఆశలు పెట్టుకున్నట్లు కనిపిస్తోంది.
